100 سؤال عن جراحات التجميل؟

في دماغك 100 سؤال وسؤال عن جراحات التجميل ومش لاقية حد يقول لك على الإجابة العلمية المفيدة والمضمونة.. يبقى تعالي نشوف الحوار الجامد أوي ده مع...




أ.د/ هبة حسين أستاذ جراحة التجميل بطب عين شمس وأنتِ تلاقي الإجابة على كل أسئلتك...



هل صحيح أن الضحكة والابتسامة.. بتسبب عدم ظهور التجاعيد؟!



أي تعبيرات على الوجه بتكون عنيفة أو بتعبّر عن حزن أو غضب؛ بتسبب خطوط وتجاعيد، وزي ما بيقولوا: "لو كشرتي هيجيلك عشر تجاعيد... ولو ضحكتي هيبقوا اثنين بس". والضحك فعلاً بيمنع التجاعيد.



إيه الفرق بين تجاعيد الجلد وتجاعيد العضلات؟!



تجاعيد العضلات.. سببها التعبيرات العنيفة والحزن والعصبية؛ لأن كل ده بيترك علامات أو تكسيرات على الجبهة وتحت العين، وده بيتعرض له الشباب في سن صغير وله علاج وحيد وآمن، وهو "البوتوكس" عن طريق حقن العضلات.

أما تجاعيد الجلد.. فهي إما وراثية أو ناتجة عن تقدّم العمر وعلاجها الوحيد هو حقن "الفيلرز"، وبتجيب نتيجة حلوة خصوصاً مع تكسيرات الأنف والفم وكرمشة الجلد والرقبة.



بيقولوا إن كريمات الحماية من الشمس غير فعّالة، ولها تأثير سلبي على البشرة... هل الكلام ده مظبوط؟!



بصراحة كريمات الحماية بماركتها المعروفة بتعطي نتائج كويسة، خصوصاً لو كانت تحت إشراف طبيب أو نتيجة عمل اختبار لنوع البشرة، وده أصبح متوفر دلوقتي بالصيدليات، وبناء عليه بيتم تحديد درجة ونوعية كريم الحماية المناسب.



إيه أكثر نسبة حماية مرتفعة طبياً لكريم الحماية؟!



لضمان أقصى حماية من أشعة الشمس إحنا بننصح باستخدام كريمات حماية "Spf 50"، وعلى فكرة ده بيقاوم للماء والعرق ودرجات الحرارة.



هل فعلاً الماكياج بيضر البشرة؟!



لا بالعكس.. الماكياج بيفيد البشرة؛ لأن جميع مستحضرات التجميل حالياً أصبحت تُصنع تحت إشراف أساتذة كليات الطب، وبتكون بداخلها فيتامينات وعازل للشمس حتى الماسكرا بتكون بداخلها مادة فعالة لتقوية الشعر وكثافته، فالماكياج بيمنع دخول الأتربة والتلوّث الجوي إلى البشرة، بس طبعاً لازم نختار ماركات ماكياج معروفة.



إيه رأيك في الماسكات الطبيعية والحمّام المغربي والتركي؛ لشد الجسم ومنع ترهل الجلد؟!



في الطبيعي عندما يتعرّض الجسم أو البشرة لبخار بيكون مفيد جداً، خصوصاً لما يكون فيه زيوت، بالإضافة إلى أن عملية المساج بتنشط خلايا الجلد وبتعطي نتائج وقتية ولفترة بسيطة وتصلح للبنات في سن صغير.



وهل فعلاً في "حقن فيتامينات" بتبيّض وتفتّح البشرة؟!



المسمى الصحيح هو "عودة البشرة لطبيعتها" وليس "تفتيح البشرة"؛ لأن مع تقدّم العمر البشرة بتتعرض للغمقان وظهور بقع، وهذه الفيتامينات لها دور هام في إعادة خلايا البشرة إلى لونها الطبيعي، والحقن دي مدروسة علمياً وآمنة جداً وأنواعها كثيرة، وتتم عن طريق أخذ عينة من الجلد وعمل اختبار لمدة ستة أشهر وبعد كده نختار الفيتامينات الخاصة بنوع البشرة.



وهل فعلاً عمليات التجميل بتجيب نتيجة عكسية؟!



علشان عمليات التجميل تجيب نتيجة لازم تكون مدروسة ومتوازنة وتتم تحت إشراف طبيب معروف وفي مكان معروف، وعلى فكرة عمليات التجميل لا تستمر مدى الحياة؛ لأنك بتحتاجي لتجديدها وإعادتها كل فترة حسب نوع العملية.



عايزين نعرف السبب العلمي والطبي لوجود التكسيرات تحت العين؟!



تكسيرات تحت العين؛ سببها إننا بنعرّض وجهنا باستمرار إلى تغيّرات عنيفة أو بسبب تعرّضنا للشمس، وأنا بانصح البنات بارتداء نضارة الشمس؛ لأنها بتحمي من الشمس وفي نفس الوقت البنت بتقدر تفتّح عينيها بطريقة طبيعية ومريحة.



هل فعلاً "الميزوثيرابي" بيزيل الدهون بسرعة؟!



أنا غير متفقة على أن "الميزوثيرابي" بيزيل الدهون بسرعة وشايفة كطبيبة تجميل أن الشفط هو أنسب وسيلة لإزالة الدهون، وشفط الدهون هو جراحة موضوعية تزيل الدهون المتراكمة في أماكن معينة أما الميزوثيرابي "فهو عبارة عن حقن بتعيد نضارة البشرة وتقفل المسام".



إيه الفرق بين "البوتوكس" و"الميزوثيرابي"؟!



هناك نوعان من التجاعيد التي تظهر للوجه؛ تجاعيد ناتجة عن حركة الوجه بتعبيرات عنيفة، والنوع الآخر تجاعيد ناتجة دون أي حركة.. و"البوتوكس" بيستعمل للتجاعيد الناتجة عن الحركة، وهو عبارة عن حقن في العضلة بيساعدها على الارتخاء، وبالتالي التجاعيد تختفي، أما "الميزوثيرابي" فهو حقن تحت الجلد بتذيب الدهون ولكن ليس بديلاً لشفط الدهون.



لكن بيقولوا إن "البوتوكس" له محاذير وآثار جانبية؟!



ما فيش أي حاجة في الدنيا مالهاش آثار جانبية والناس اللي بتعتقد أن "الشفط" و"البوتوكس" خطر ده كلام غير صحيح بالمرة، ولازم البنت تفكر كويس وتفهم التقدم الطبي والعلاج الحديث وتقرأ كتير وتتابع الحالات والتجارب.



عايزين نتعرف على أنواع التقشير الكيميائي، وهل بيختلف على لون ونوع البشرة؟!


التقشير الكيميائي من أفضل علاجات التجميل وبيعتمد على نوع البشرة ونوع البقع وشكل التجاعيد ويوجد أنواع:



النوع الأول:
"تقشير بأحماض الكوجيك" وهو مرحلة أولى، وبيساعد على توحيد لون الجلد، وليس له أي آثار جانبية وبيناسب جميع أنواع البشرة.



النوع الثاني:
"التقشير بأحماض الفواكه" وبيساعد على علاج التجاعيد والحروق وبيناسب أكثر البشرة البيضاء.



النوع الثالث:
"التقشير الأصفر" وهو تقشير سطحي وبيعتمد على جلسات كل عدة أسابيع ويناسب جميع أنواع البشرات.

والتقشير الكيميائي عموماً بيوحّد لون البشرة ويزيل الحبوب ويُعالج الحروق ويزيل التجاعيد.



لكن ليه بيظهر بعد التقشير الكيميائي احمرار للبشرة لدرجة الحرق؟!



لأن التقشير الكيميائي بيستعمل بواسطة أنواع كثيرة من الأحماض والتقشير العميق بيصل إلى درجة الحرق، لكن بيكون لفترة معينة وبعد كده الجلد بيرجع أحسن مما كان عليه.



في شكوى من البنات إن الليزر بيخلي الشعر يظهر في أماكن أخرى متفرّقة من الوجه والجسم؟!



الشعر الزيادة ده موجود طبيعي من قبل إجراء عملية الليزر، ولكن مع استعمال الليزر بتنشط المنطقة المحيطة فيظهر الشعر الموجود طبيعي، ولكن بعد ما يسلط الليزر بيختفي تماماً، يعني الليزر بيساعد على تنشيطه وبعدين إزالته نهائياً.



هل "الثيرماج" بديل لجهاز الليزر؟!



الناس فاكرة أن الثيرماج حقن ومتلخبطة، لكن الثيرماج هو جهاز موجات راديو لما بيتعرّض له الجسم بينشط الكولاجين الموجود طبيعي في الجسم واللي بيحافظ على الجلد طبيعي، ولكن بيضعف نتيجة السن والشمس والضعف والإرهاق فجهاز الثيرماج يُعيد حيوية الكولاجين، وبالتالي يُعيد حيوية ونضارة الجلد والجسم والبشرة.



بنسمع كمان عن علاج الحروق والتشوّهات الجلدية بالأوزون، لكن يعني إيه أوزون؟!



الأوزون هو غاز موجود بالطبيعة وبيكون من آثار الأشعة فوق البنفسجية للشمس على الأكسجين فيتحوّل إلى أوزون، نقوم بإدخاله إلى الجسم عن طريق حقن بالدم أو حقن موضعي مباشر في مكان الحرق والتشوه، والأوزون آمن تماماً ولا يوجد له آثار جانبية طالما استخدمت الجرعة والطريقة المناسبة.



إيه فوائده بالنسبة للجمال والرشاقة؟!



الأوزون مفيد جداً للرياضيين ويُجدد دائماً من حيوية الجسم وعدم الإحساس بالإرهاق ويُحسّن الحالة العامة، وبالتالي ينعكس على البشرة والجسم كله ويُعالج جميع أنواع الحروق.



ما الفرق بين حقن الأوزون ومرهم الأوزون؟!



المرهم بيتم تحضيره بتمرير غاز الأوزون في زيت الزيتون مدة طويلة ويستخدم في علاج الجروح والتقرحات المزمنه والحروق وهو علاج موضعي، أما الحقن نتائجها مثل نتائج العمليات الجراحية.



إيه نسبة نجاح حقن الشفايف.. وهل فعلاً بتأثّر على حركة الكلام والصوت بعد كده؟!



حقن الشفايف بتأثر على حركة الكلام أثناء العملية فقط، لكن بعد العملية لا يوجد أي تغيّرات في الصوت أو الحركة ولا يوجد أي آثار جانبية إطلاقاً.



إزاي يتم حقن الخدود بطريقة آمنة؟!



أحسن طريقة لحقن الخدود هي عملية زرع الدهون من منطقة إلى أخرى وبتكون على شكل عضمة "زيكوما" عضمة الخد.. وهي عبارة عن أخذ دهون طبيعية من الجسم وتزرع داخل الخدود والنتيجة تكون آمنة جداً جداً، ولكن المهارة في وضع هذه الدهون بطريقة صحيحة في الخدود ويُفضّل أن تكون بالطول وعلى فكرة كل عمليات التجميل تتم بالمنظار يعني ما فيش خوف.



إيه العوامل اللي بيتوقف عليها نجاح عملية تجميل الأنف؟!



يتوقف نجاح عملية تجميل الأنف على اختيار الطبيب المناسب والذي سبق له إجراء العديد من العمليات الخاصة بتجميل الأنف، وهذه العملية بالذات لا تشترط سن معين ولابد من أجراء فحوصات دم للاطمئنان على الصحة العامة من وجود سكر أو ضغط أو غيره... وبعد كده بتتم العملية عن طريق تخدير موضعي، ويقوم الطبيب بتعديل عضمة الأنف بما يناسب شكل الوجه دون التعرّض إلى الهيكل الداخلي والوظائف التنفسية للأنف، وتستمر العملية حوالي ساعة وبعد كده يتحسّن وضع الأنف تدريجيا خلال أسبوع، ولكن يُفضّل عمل عملية تجميل الأنف في سن صغيرة؛ لأن الجلد بيكون قادر على الانكماش بسهولة.



وإيه أحسن جراحة لتصغير وتكبير الثدي؟!



التصغير بنحاول نزيل جزء منه ونحافظ على العصب بأقل جروح ممكنة، أما التكبير فبيكون عن طريق "السليكون" وهي طريقة آمنة جداً جداً وهي الجراحة الأولى في أمريكا وأوروبا.



إزاي بيتم شد الحواجب؟!



عملية شد الحاجبين بتتم عن طريق قطع بعض العضلات الموجودة في الأورة علشان نجعل المنطقة بين الحاجبين لا تتعرض للتقلص والانكماش، وكمان ممكن عمل أشكال مختلفة وثابتة للحاجب وهي العمليات المنتشرة جداً بين البنات وبتستمر على طول.