محجبات آخر موضة مع جيلان عاطف

لكل بنت محجبة عايزة تظهر بكامل شياكتها وأناقتها وتحافظ على وقار حجابها.. تابعي معانا نصايح خبيرة التجميل والاستايلست جيلان عاطف؛ علشان تعرفي إيه هي آخر موضة في الألوان والموديلات وكمان لفات الطرح، وإزاي تنسّقي الألوان مع بعضها...

الموديل الأول
أول موديل معانا عبارة عن تونيك أخضر طويل، وبيتربط بطرق مختلفة على حسب شكل جسمك، وإذا كنتي عايزة تظهري منطقة الوسط ولا لأ، ومعاه جوب بنطلون واسعة، ودي ميزتها إنها واسعة وبسيطة وبتبقى مريحة في الصيف؛ لأن الخامات كلها بتبقى أقطان.

والجوب بنطلون ميزتها إنها بتبقى بسيطة وواسعة ومريحة، وما بتحددش تفاصيل الجسم؛ لإن المحجبة لازم تلبس حاجات ماتبينش ملامح جسمها.

الإكسسوارات.. أنا ماحبيتش إنها تلبس إكسسوارات كتيرة، واخترت عقد عليه أخضر وعقد بيج بنقشة جلد النمر، والإيشارب تقريبا فيه نفس الألوان والنقشات اللي موجودة في الإكسسوارات اللي اخترتها.

ربطة الطرحة.. زي ما هنشوف في الفيديو هي بسيطة جدا ومافيهاش تكلّف، يعني أي واحدة لسه محجبة جديد ممكن تعملها لنفسها، وهو إيشارب مربع على الاستايل التركي وبنربطها على ورا.

الموديل التاني
الموديل ده عبارة عن جوب بنطلون لونها رمادي فاتح وعليها بادي، وميزة البادي ده إنه واسع فهو مناسب لأي واحدة حتى لو دراعها مليان؛ لإن الكم بتاعها واسع أوي وفيه قصات كتيرة وملموم في الآخر بإسورة، وعلى البادي لبست كارديجان لونه موف مربوط من عند الوسط ونازل، وعلى الموديل ده اخترت عقد طويل علشان يبقى باين، واخترت كمان للموديل ده شنطة متوسطة عليها نقشة جلد النمر أو التايجر.

الإيشارب بقى ربطته هتكون بشكل بسيط خالص، ومن تحته اخترت باندانا رمادي وباندانا موف، والإيشارب من فوق مربع ستان ولونه موف مشجر ومربوط على ورا، والربطة دي بسيطة أوي وعملية في الصيف وبتليق على معظم الوشوش؛ لكن لو وشك طويل ممكن تعمليها وتجيبيها على جنب هيبقى شكلها ألطف، والموديل ده هيليق على أي بنت جسمها رفيع أو متوسط الحجم.



الموديل الثالث
الموديل ده عبارة عن بادي كات لونه جنزاري، وعليه كارديجان لونه بيج، وعليه كارديجان تاني متركّب عليه لونه جنزاري، والسروال زي ما إحنا شايفين لونه بيج.. أنا تعمدت البساطة في الموديل ده؛ يمكن هو الفكرة فيه إنه متركب فيه كذا حاجة فوق بعض.

أكيد الموديل ده هيبقى مناسب لمعظم المحجبات حتى لو كانت ممتلئة؛ لأنها ممكن تستغنى عن الحزام خالص، وممكن تحطه بحيث يبقى ساقط شوية علشان ما يحددش منطقة البطن عندها.

وربطة الإيشارب بسيطة أوي وبرضه على ورا، أنا بحب أوي المحجبة حتى لو رابطة الإيشارب على ورا رقبتها ماتكونش باينة؛ علشان كده بافضل الهاي نيك أو الهاي كول بحيث تكون الرقبة متغطية.

والشنطة بتاعة الموديل ده حجمها متوسط، وهي عملية جدا للبنت اللي بتحب تشيل حاجات كتيرة في شنطتها.