الخميرة لشفايف نضرة والمشمش لشعر لامع

ولسه مكملين معاكم وصفات كتيرة بالمشمش الفريش والمجفف..




هنعمل به ماسكات للبشرة والشعر، تابعونا.


زي ما قلنا في الحلقة اللي فاتت إن المشمش من الحاجات المفيدة جدا للبشرة والشعر سواء الفريش أو الجاف؛ وده لأنه بيحتوي على فيتامين A و C ونسبة من البيتاكاروتين ودي مفيدة وهامة للبشرة والشعر، كمان غني بالأملاح المعدنية والحديد والنحاس والكالسيوم وهو مقوي ومنشط ومغذي وبيدي نضارة للبشرة والإيدين.

مهم جدا إننا نفرق في الاستخدام بين المشمش الفريش والمشمشية الجافة؛ وده لأن المشمشية الجافة بيكون فيها نسبة عالية من السكر، وعلشان كدة نقدر نستخدمها في ماسكات سنفرة للجسم والبشرة، ونقدر نسلقه ونهرسه ونعمل بيه ماسكات للبشرة، وكمان وصفات عصاير للشرب وبيكون طعمها هايل.



وكمان نقدر نعمل منه ماسكات للشعر، بس لازم ناخد بالنا إن لو هنستخدم المشمشية المجففة للشعر يبقى هنحط معاها مواد تانية زي اللبن أو الزبادي، ونسيبها على الشعر لمدة 10- 15 دقيقة فقط، أما لو هنستخدم المشمش الفريش ممكن نحطه لمدة 30 دقيقة؛ وده علشان يفضل إننا لما نحط حاجة على شعرنا مايكونش فيها نسبة سكر عالية.

عصير المشمش
المقادير:

2 كوب ميه
1/ 4 كيلو مشمش

الطريقة:
هنحط الميه في حلة على النار، ونحط فيه المشمش بعد ما ننزع البذر، ونسيبهم على نار عالية يتسلق كويس أوي، ولحد ما المشمش يستوي تماما.

بعد ما المشمش يستوي هنضربه في الخلاط كويس أوي بدون إضافة سكر، وهيكون طعمه لذيذ جدا، وكمان نقدر نعمل منه ماسكات للبشرة والشعر.



ماسك الخميرة لشفايف وبشرة نضرة
الماسك ده مفيد جدا؛ لأنه بيدي نضارة ورونق قوي للبشرة، وهو ليه طريقتين نعمله بيها.

الطريقة الأولى:
هي إننا بنجيب ملعقة حلبة صحيحة مش مطحونة، ونحطها في فنجان ميه ونسيبها من بالليل لحد الصبح، وبعدين ناخد الميه، ونخلط فيها قطعة خميرة بيرة، والميه اللي طلعت دي ممكن نحتفظ بيها في التلاجة لمدة 2- 3 أيام فقط، وناخد منها كل يوم ندوب بيها الخميرة.

هناخد الخليط ده ونحطه على وشنا لمدة 15 دقيقة وبعدين نشطفه.


الطريقة التانية هتكون عبارة عن:
المقادير:

ملعقة كبيرة حلبة مطحونة
قطعة خميرة بيرة
2 ملعقة كبيرة ميه

الطريقة:
هنخلط المكونات مع بعض لحد ما تعمل قوام كريمي، ولو لقيتيها جامدة ممكن تزودي ميه تاني لحد ما توصل للقوام اللين المطلوب.

هناخد من الماسك ونحط على بشرتنا وشفايفنا، وممكن نحط حول العين لكن بمسحة خفيفة جدا ومانفركهاش، ونسيبه لمدة 15 دقيقة وبعدين نشطفه.

الماسكين دول نقدر نعمل منهم ونستمر عليه يوميا، وهنلاقي نتيجة هايلة للخدود والشفايف، وهو مفيد لكل أنواع البشرة، ولكن البشرة الحساسة هتحط منه بس مش أكتر من 5 دقائق فقط.

وممكن مع الماسكات دي نعمل ماسكات تانية، ولكن هنخلي ده هو الأساسي بمثابة كريم يومي للبشرة.



ماسك المشمش للشعر
المشمش من الحاجات المفيدة جدا للشعر، بيغذيه ويقويه ويدي له لمعة ونعومة.

ممكن نعمله بعدة طرق:
هنغسل شعرنا مرتين، وبعدين نحط عليه عصير مشمش من الجذور لحد الأطراف، ونسيبه لمدة 20- 30 دقيقة فقط، وبعدين نشطف شعرنا بالميه.

كمان ممكن نحط على العصير قطعة بلسم أو حمام كريم، ونحطها على الشعر ونسيبها برضو لمدة 20- 30 دقيقة، وبعدين نشطفها.


ماسك المشمش والرز لتفتيح البشرة
المقادير:

3/4 فنجان عصير مشمش
ملعقة رز مطحون

الطريقة:
هنحط العصير في حلة على النار ونسيبه شوية؛ علشان يدفى، وبعدين نحط الرز ونقلبه لحد ما قوامه يبقى لزج جدا.

الماسك ده هايل جدا ونقدر نحطه على وشنا وكمان المنطقة حول العين، وعلى الجسم كله والمناطق الحساسة، ونحاول نحط من الماسك ده وهو لسه دافي، ونسيبه لمدة نصف ساعة وبعدين نشطفه بالميه.

الماسك ده هيدي للجسم نعومة وكمان بيخلي الجسم ريحته حلوة جدا.