اعملي ماكياج شتوي بسيط بألوان مناسبة لبشرتك

اعملي ماكياج شتوي بسيط بألوان مناسبة لبشرتك




في فصل الشتاء ومع برودة الجو البشرة بيكون شكلها مرهق ولونها باهت، ومش بيكون فيه وقت كافي للعناية بيها في أوقات النهار، خصوصا لو كنتِ بتشتغلي أو في الجامعة..

علشان كده جبنا لك النهارده خطوات بسيطة ممكن تعملي بيها ميك أب رقيق وناعم، يضيف حيوية لبشرتك في فترة الصبح..

أصحاب البشرة الفاتحة
الآي شادو
درجات الآي شادو المائلة للروز أو البرونزي الفاتح مع لمعة بسيطة، هتكون مناسبة جدا لأصحاب البشرة الفاتحة.

وعلشان تضفي لمسة جمالية رقيقة على عيونك قبل ما تنزلي للشغل أو الجامعة، ممكن توزّعي طبقة خفيفة من الآي شادو بالدرجات اللي قلنا عليها على منطقة الجفون فوق خط الرموش مع التدريج لأعلى، لغاية ما توصلي لمنطقة قوس العين، بحيث درجة اللون تتدرج على فاتح، وبعد كده مشّطي رموشك باستخدام فرشة الماسكرا علشان تنظّفيها من آثار الآي شادو، وآخر خطوة إنك تكثفي الرموش باستخدام الماسكرا السوداء.

البلاشر
درجات البلاشر المائلة للبرونزي الفاتح والخوخي هتناسب أصحاب البشرة الفاتحة، لأنها هتضيف لهم لمسة دافية على منطقة الخدود، وأفضل طريقة ممكن توزّعي بيها البلاشر هي إنك تجيبي فرشة كبيرة وتوزّعي البلاشر البرونزي الفاتح على وشك بالكامل بطريقىة خفيفة وناعمة، وبعد كده تحدّدي عظمة الخدين باللون الخوخي.

أحمر الشفاه
درجات الروج المائلة للخوخي هتكون رائعة على شفايفك مع الماكياج الخفيف اللي عملتيه، وخصوصا لو أضفتي عليها لمعة خفيفة.





البشرة السمراء أو القمحية
الآي شادو
درجات الآي شادو البرونزية (الدرجات المتوسطة بين الفاتح والغامق) تعتبر من أفضل الألوان المناسبة لأصحاب البشرة الخمرية والسمراء.

وعلشان تظهري بشكل جميل وجذّاب ممكن توزّعي طبقة من الآي شادو بالدرجات البرونزية على منطقة الجفون فوق خط الرموش مع التدريج لأعلى، لحد ما توصلي لمنطقة قوس العين من الأتقل للأخف، بعد كده مشّطي رموشك باستخدام فرشة الماسكرا، وأخيرا كثّفي رموشك بالماسكرا السوداء.

البلاشر
درجات البلاشر المائلة للأحمر أو الوردي شوية، وكمان البرونزي مناسب جدا لبشرتك لو كنتي خمرية.

علشان تضفي لمسة جميلة ودافية لخدودك، ممكن تجيبي فرشة البلاشر وتحطّي طبقة من البلاشر البرونزي بالدرجة اللي متوضّحة في الصورة على كامل منطقة الوجه، بما فيه الأنف والذقن وكمان عند منبت الشعر، وبعد كده ضيفي طبقة بسيطة من درجة البلاشر الوردية اللي قلنا عليها على منطقة عضمة الخدين.

أحمر الشفاه
أحمر الشفاه بدرجة البرتقالي المائل للأحمر هتكون مناسبة جدا لبشرتك وكمان غير تقليدية، والأفضل إنك تستخدمي نوع روج مط خالي من اللمعة.