اعرف وزنك مناسب ولّا لأ.. بطريقة سهلة!

يا ترى وزني كده مناسب ولا لأ؟

هل محتاجة أستشير دكتور ولّا ممكن أقلل من أكلي شوية، ويا ترى محتاجة أنزل كام كيلو؟

يا ترى طولي مناسب مع وزني، ولّا لأ؟

أسئلة كتيرة ومشكلات أكتر بتواجهنا لما بنقرر نعمل ريجيم...

وطبعاً د. محمد أبو الغيط معانا علشان يرد على كل أسئلتنا...



إزاي نحسب الوزن المثالي... وإيه الفرق بين الوزن الزائد والسمنة المرضية؟
مهم جدا نعرف نحسب وزننا ونعرف هل نعاني فعلا مرض السمنة أو مجرد زيادة في الوزن، وفيه طريقتين لحساب السمنة؛ إما بحساب معامل كتلة الجسم أو بقياس محيط الوسط.



إزاي نحسب معامل كتلة الجسم؟
يمكن حسابه برقمين؛ الرقم الأول الوزن بالكيلو جرام، والثاني الطول بالمتر، مثلاً: لو طولي 170 سم ووزني 100 كيلو.. نقسم الوزن على مربع الطول بالمتر (100 / 1.7 × 1.7).

- لو الناتج كان يتراوح بين 18.5 إلى 25؛ معنى كده إن الوزن طبيعي جداً.

- لو الناتج كان يتراوح بين 25 إلى 30؛ ده معناه إن فيه وزن زائد، وهو مؤشر لبداية الخطر والدخول في مرحلة السمنة.

وهذه المرحلة تتطلّب مجرد إجراءات للسيطرة على الزيادة في الوزن، ولا تحتاج بالضرورة إلى علاج، وصاحب الوزن الزائد مطلوب منه الانتباه إلى طبيعة طعامه، والابتعاد عن المأكولات ذات السعرات الحرارية العالية، وأن يُقلِّل من الوجبات الجاهزة وشرب المياه الغازية، بالإضافة إلى ممارسة التمارين الرياضية حتى لا ندخل في مرحلة السمنة.



وامتى نحتاج لعلاج ومساعدة طبيب متخصص؟
العلاج يبدأ عندما يكون ناتج معامل كتلة الجسم يتراوح بين 30 إلى 35، وهذا يعني أن المريض يعاني سمنة من الدرجة الأولى، ومن 35 إلى 40 يبقى المريض بيعاني سمنة من الدرجة الثانية، ومن 40 فأكثر نعتبرها سمنة مرضية خطيرة جداً تتطلّب تدخّلاً دوائياً، واتباع نظام غذائي لإنقاص الوزن.



وإيه هي الطريقة الثانية لحساب الوزن؟
الطريقة الثانية هي قياس محيط الوسط؛ لأن هناك بعض الأشخاص تتركّز مشكلتهم أو وزنهم الزائد في منطقة البطن فقط أو ما نسمّيه الكرش، مع أن باقي الجسم قد يكون عادياً أو غير ممتلئ.

والكرش هو تكتّل مجموعة من الدهون داخل البطن... المشكلة إن الشخص مهما كان وزنه قليل، وعنده كرش حجمه كبير، فإن الدهون الموجودة في الكرش تفرز هرمونات مضرّة للغاية.



السؤال الآن ما هو القياس الأمثل لمحيط الوسط؟
محيط الوسط لو كان أقل من 80 سم للبنات وتحت 94 سم للشباب، فلا توجد مشكلة.

تبدأ المشكلة لو البنت محيط وسطها 80 سم إلى 88 سم، وبالنسبة للولد لو تعدّى محيط وسطه 94 سم إلى 102 سم، أما إذا زاد محيط الوسط عن 88 للبنات فهذا مؤشر خطورة، وفي الحالة دي نحتاج علاج سريع وفعّال لتجنّب المخاطر الطبية.



فيه شباب كتير بيعانوا سمنة بشكل ملحوظ بالرغم من قضائهم أغلب الوقت خارج البيت بدون أكل؟
علشان نتغلّب على المشكلة دي، لازم نعرف أسباب السمنة وليه وزننا بيزيد بسرعة...

السبب الأول: الإفراط في أكل أنواع ذات سعرات حرارية عالية جداً وبكميات كبيرة، زي المحمّرات، والأكل الدسم، والوجبات السريعة.

السبب الثاني: هو قلة الحركة؛ لأن الحياة النهارده بنحرّكها بالريموت كونترول، وأوقات الفراغ غالبا ما بنقضيها أمام الكمبيوتر أو لعب البلاي استيشن بالساعات.

السبب الثالث: الاستعداد الوراثي للسمنة، ناس كتير بتاكل كتير وحركتهم قليلة، وعلى الرغم من كده وزنهم عادي أو طبيعي.. هؤلاء لا يوجد في تاريخهم المرضي شخصيات مصابة بالسمنة، لكن -في الغالب- المصريون بطبيعتهم عندهم جينات وراثية تحمل مرض السمنة.

ليه معدلات السمنة زادت قوي عن زمان؟
ده يرجع لعدة أسباب؛ أولا: الحياة اتغيرت كتير عن زمان، فطبيعة العمل أصبحت تتطلب البقاء خارج البيت لفترات طويلة، وطبعا كل ما نحسّ بالجوع بنشتري وجبات سريعة، من غير ما نفكّر في السعرات الحرارية، فمثلا وجبة الهامبورجر 65% منها دهون والباقي لحم صافي.

وبالمناسبة الوجبة دي قد تؤخر إحساسك بالشبع؛ لأن الدهون تخدّر جدار المعدة، وحتى تصل إلى مرحلة الشبع قد تأكل كميات كبيرة من غير ما تشعر.

ثانيا: معدل الحركة قل جداً عن زمان.. فقبل ذلك لم يكن هناك ألعاب كمبيوتر ولا أسانسير.. ولا ريموت كنترول، وكل أنواع التكنولوجيا المسخَّرة لراحة الإنسان أو بمعنى آخر لتزيد من كسله وقلة حركته.

ثالثاً: العادات.. فيه بعض العادات الغذائية الخاطئة؛ مثل ربط الأكل بالفرجة على التليفزيون، ودي طبعا عادة خطيرة جداً.. فالواحد ممكن ياكل كميات كبيرة بدون أن يشعر وهو أمام التليفزيون.

وعلشان نتغلب على المشكلة دي لازم نغير من عاداتنا، نبعد عن العادات الغذائية المضرة، ومش لازم ننسى إن متوسط عمر الشخص الذي يعاني السمنة أقلّ سبع سنوات مقارنة بالشخص العادي، يعني السمنة دي حاجة بتهدد صحتنا وحياتنا ولازم نعالجها.



البعض قد يجد صعوبة بالغة في البدء في الريجيم، ويرفض الاستمرار لمجرد الفشل في أول تجربة.. إيه رأيك؟
موضوع الريجيم له وجهتان للنظر؛ الأولى جمالية أو شكلية والأمر هنا نسبي.. يعني فيه ناس حاسة إن شكلهم حلو كده ودمهم خفيف في الوزن الزائد، وأصحابهم وأهلهم بيحبوهم وهمّ كده، يعني بتكون بالنسبة لهم مسألة شخصية حسب الذوق والهوى.

ولكن ما يهمنا ويقلقنا هو وجهة النظر الطبية، فالسمنة مرض يهدد صحة الشباب.. ولو الحكاية تنحصر في مجرد الشكل فكل واحد له مطلق الحرية أن يكون كما يريد.. لكن السمنة مرض حقيقي وخطير يهدد الأجيال القادمة، فالشاب الذي يعاني السمنة يضاعف احتمالات إصابة أولاده بها وبصورة أكبر وأسوء.

علشان كده لازم يكون عندنا إرادة وعزيمة وصبر علشان نقدر نتغلب على المرض ده.



هل ممكن نحرق السعرات العالية اللي في الأكلات السريعة، بالمشي أو الجري؟
ده اعتقاد خاطئ جداً عمليا؛ فوجبة الكومبو التي لا تستغرق سبع دقائق في أكلها تحتاج إلى سبع ساعات مشي جاد وسريع لحرق سعراتها الحرارية.

كيلو الدهون في الجسم يحتوي على 7 آلاف سُعر حراري، والرياضة لمدة ساعة تحرق من 200 إلى 300 سعر حراري، وبالتالي فالشخص يحتاج إلى حوالي 21 ساعة رياضة للتخلص من كيلو دهون واحد، أي ساعة رياضة يومياً ولمدة شهر تقريبا.



إيه اللي ممكن ناكله وإحنا بره البيت في الكلية أو الشغل؟
الوجبة المثالية اللي ممكن ناكلها وسهل جدا إننا ناخدها معانا بره البيت هي الفاكهة؛ لأنها تحتوي على نسبة كبيرة من الألياف، مما يساعد على الشعور بالامتلاء، وبالإضافة إلى إن السوائل الموجودة بداخلها بتعطينا شعور بالارتواء، كمان السكر الطبيعي يمدّنا بالطاقة التي تساعدنا على العمل والتركيز طوال النهار بدون الشعور بالخمول.

لكن مع الأسف بعض الشباب شايفين إن أكل الفاكهة حاجة غريبة، يعني الشاب يقول لنفسه: "يعني إيه أقف بين أصحابي وأطلّع فاكهة وآكلها عادي كده قدامهم؟" وكأنها حاجة عيب أو حرام.



فيه ناس حالتهم النفسية مرتبطة بالأكل، والريجيم صعب عليهم جداً.. يعملوا إيه؟
في البداية لازم كل واحد يحدد حجم المشكلة اللي عنده ومدى خطورتها، يعني هل السمنة بدأت تسبب له مشاكل صحية؛ مثل: النهجان مع الحركة، وآلام المفاصل، وزيادة العرق مع المجهود.

كمان لازم نفكر في خطورة الإصابة بالأمراض التي تسببها السمنة، والتي يمكن أن تبدأ بمرض السكر، ثم ارتفاع ضغط الدم وفي مرحلة لاحقة قد تكون الإصابة بأمراض القلب والحصوات المرارية ونزيف المخ وبعض الأمراض السرطانية، لا قدّر الله.

ولو حسينا إن البداية صعبة نبدأ بالسهل، وبلاش نحطّ أهداف يصعب تحقيقها في الوقت الحالي؛ بمعنى أنه ليس من الضروري أن يفقد الشخص وزنه الزائد مرة واحدة، يعني لو الوزن المثالي لشخص معين المفروض يكون 60 كيلو، ووزنه الحالي 100 كيلو، ممكن يكتفي بإنقاص 10% من وزنه؛ لكي يبعد عنه مخاطر الإصابة بأمراض السمنة، وبعد كده يبدأ في تثبيت وزنه، وبعد شوية يضع هدف ثاني.